Höfuðverkur getur verið þrálátur og haft veruleg áhrif á daglegt líf. Hann getur birst á ýmsan hátt, en algengustu tegundirnar eru spennuhöfuðverkur, mígreni og cervicogenic höfuðverkur (hálshöfuðverkur).

Spennuhöfuðverkur er ein algengasta tegundin og tengist oft vöðvaspennu í hálsi og öxlum, streitu eða langvarandi kyrrsetu. Einkennin lýsa sér gjarnan eins og þrýstingur eða „band“ um höfuðið. Hann kemur oft fram við streitu eða álag.

Mígreni lýsir sér oft sem einhliða, púlserandi höfuðverkur með ljós- og/eða hljóðfælni, þó hann geti einnig verið tvíhliða. Fyrirboði (ára) getur komið fram fyrir mígreniskast og lýsir sér t.d. sem sjóntruflanir (stjörnur eða ljósblossar), náladofi, svimi, ójafnvægi eða taltruflanir. Mígreni kemur oft eftir streitutímabil.

Cervicogenic höfuðverkur er yfirleitt einhliða og á upptök sín í hálsi. Verkurinn leiðir oft frá hnakka fram að gagnauga eða bak við auga. Helst oft í hendur við skertan hreyfiferil í hálsi og getur versnað við ákveðnar höfuðhreyfingar.